ಬೆಂಗಳೂರು: ರಾಜ್ಯ ಸರ್ಕಾರದ ವಿವಿಧ ಇಲಾಖೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಧಿಕಾರಿಗಳು ಹಾಗೂ ಸಿಬ್ಬಂದಿಗೆ ಆರ್ಥಿಕ ಇಲಾಖೆಯ (HRMS-2.0 ನಿರ್ದೇಶನಾಲಯ) ವತಿಯಿಂದ ಮಹತ್ವದ ಸುತ್ತೋಲೆ ಹೊರಡಿಸಲಾಗಿದೆ. ಇನ್ಮುಂದೆ ಎಲ್ಲಾ ಸರ್ಕಾರಿ ನೌಕರರು ತಮ್ಮ ದಿನನಿತ್ಯದ ಹಾಜರಾತಿಯನ್ನು ‘ಕರ್ತವ್ಯ (KAMS)’ ಮೊಬೈಲ್ ಆಪ್ ಮೂಲಕವೇ ದಾಖಲಿಸಬೇಕಿದ್ದು, ಬೆಳಗ್ಗೆ 10 ಗಂಟೆಯೊಳಗೆ ಹಾಜರಾತಿ ನೋಂದಾಯಿಸುವುದು ಕಡ್ಡಾಯವಾಗಿದೆ.
ಸರ್ಕಾರಿ ಕಚೇರಿಗಳಲ್ಲಿ ಹಾಜರಾತಿ ವ್ಯವಸ್ಥೆಯನ್ನು ಮತ್ತಷ್ಟು ಪಾರದರ್ಶಕ ಹಾಗೂ ಪರಿಣಾಮಕಾರಿಯಾಗಿ ಮಾಡಲು ಈ ಕ್ರಮ ಕೈಗೊಳ್ಳಲಾಗಿದೆ. ಜೊತೆಗೆ, ಕಚೇರಿಗಳ ನಿಖರ ಸ್ಥಳವನ್ನು ಗುರುತಿಸಲು ಜಿಯೋ ಟ್ಯಾಗಿಂಗ್ (Geo Tagging) ವ್ಯವಸ್ಥೆಯನ್ನೂ ಸರ್ಕಾರ ಜಾರಿಗೆ ತಂದಿದೆ.
ಹೊಸ ನಿಯಮದ ಪ್ರಮುಖ ಅಂಶಗಳು
ಹೊಸ ಮಾರ್ಗಸೂಚಿಯ ಪ್ರಕಾರ ಎಲ್ಲಾ ಇಲಾಖೆಗಳ ಅಧಿಕಾರಿಗಳು ಮತ್ತು ಸಿಬ್ಬಂದಿ ತಮ್ಮ ಹಾಜರಾತಿಯನ್ನು ಕೇವಲ KAMS ಆಪ್ ಮೂಲಕವೇ ದಾಖಲಿಸಬೇಕು. ಹಾಜರಾತಿ ದಾಖಲಿಸುವ ಸಮಯದಲ್ಲಿ ನೌಕರರ ಸ್ಥಳದ ಮಾಹಿತಿ ಸಹ ಪರಿಶೀಲನೆಗೊಳಪಡಲಿದೆ.
ಇದರೊಂದಿಗೆ, ಪ್ರತಿಯೊಂದು ಸರ್ಕಾರಿ ಕಚೇರಿಯ ಭೌಗೋಳಿಕ ನಿರ್ದೇಶಾಂಕಗಳನ್ನು (Geo Coordinates) ಸಂಗ್ರಹಿಸಿ HRMS-2.0 ವ್ಯವಸ್ಥೆಯಲ್ಲಿ ದಾಖಲಿಸುವ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ. ಈ ಮೂಲಕ ಸಿಬ್ಬಂದಿ ಕಚೇರಿಯಲ್ಲೇ ಹಾಜರಿದ್ದು ಕರ್ತವ್ಯ ನಿರ್ವಹಿಸುತ್ತಿರುವುದನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಾಗಲಿದೆ.
ಜಿಯೋ ಟ್ಯಾಗಿಂಗ್ಗೆ ಅಧಿಕಾರಿಗಳ ನೇಮಕ
ಜಿಯೋ ನಿರ್ದೇಶಾಂಕಗಳನ್ನು ದಾಖಲಿಸಲು ಪ್ರತಿ ಕಚೇರಿಯ ಡಿಡಿಒ (DDO) ಅವರು ತಮ್ಮನ್ನು ತಾವೇ ಅಥವಾ ಗ್ರೂಪ್ ‘ಬಿ’ ಮತ್ತು ಅದಕ್ಕಿಂತ ಮೇಲಿನ ಹುದ್ದೆಯ ಅಧಿಕಾರಿಯನ್ನು ನಾಮನಿರ್ದೇಶನ ಮಾಡಬೇಕು. ನಾಮನಿರ್ದೇಶಿತ ಅಧಿಕಾರಿಯು ಕಚೇರಿಯ ಆವರಣದಲ್ಲೇ ಭೌತಿಕವಾಗಿ ಹಾಜರಿದ್ದು ಜಿಯೋ ಲೊಕೇಶನ್ ಅನ್ನು ಸೆರೆಹಿಡಿಯುವುದು ಕಡ್ಡಾಯವಾಗಿದೆ.
ಜಿಯೋ ಟ್ಯಾಗಿಂಗ್ ಮಾಡುವ ವಿಧಾನ
ಹಂತ 1: ಡಿಡಿಒ/ಅನುಮೋದಕರು ಮಾಡಬೇಕಾದದ್ದು
- HRMS 2.0 ವೆಬ್ ಪೋರ್ಟಲ್ಗೆ ಲಾಗಿನ್ ಆಗಬೇಕು.
- ಸಂಬಂಧಿತ ಕಚೇರಿಯನ್ನು ಆಯ್ಕೆ ಮಾಡಿ ವಿಳಾಸದ ವಿವರಗಳನ್ನು ಪರಿಶೀಲಿಸಿ ನವೀಕರಿಸಬೇಕು.
- ಜಿಯೋ ನಿರ್ದೇಶಾಂಕ ಸಂಗ್ರಹಣೆಗಾಗಿ ಅಧಿಕಾರಿಯನ್ನು ನಾಮನಿರ್ದೇಶನ ಮಾಡಬೇಕು.
- ಬಳಿಕ ‘Save & Confirm’ ಆಯ್ಕೆಯನ್ನು ಬಳಸಿಕೊಂಡು ಮಾಹಿತಿಯನ್ನು ದೃಢೀಕರಿಸಬೇಕು.
ಹಂತ 2: ನಾಮನಿರ್ದೇಶಿತ ಅಧಿಕಾರಿ ಮಾಡಬೇಕಾದದ್ದು
- HRMS2-ESS ಆಪ್ಗೆ ಲಾಗಿನ್ ಆಗಬೇಕು.
- ‘My Profile’ ವಿಭಾಗಕ್ಕೆ ತೆರಳಬೇಕು.
- ‘Capture My Office Location’ ಆಯ್ಕೆಯನ್ನು ಕ್ಲಿಕ್ ಮಾಡಬೇಕು.
- ಕಚೇರಿಯ ಸ್ಥಳದಲ್ಲೇ ನಿಂತು ಮೊಬೈಲ್ನ Location ಮತ್ತು Internet ಸೌಲಭ್ಯಗಳನ್ನು ಆನ್ ಮಾಡಿ ‘Submit’ ಬಟನ್ ಒತ್ತಬೇಕು.
- ಪ್ರಕ್ರಿಯೆ ಯಶಸ್ವಿಯಾದ ಬಳಿಕ ಹಸಿರು ಬಣ್ಣದ ಟಿಕ್ (Green Tick) ಚಿಹ್ನೆ ಕಾಣಿಸುತ್ತದೆ.
ತಾಂತ್ರಿಕ ಸಮಸ್ಯೆ ಇದ್ದರೆ ಸಹಾಯವಾಣಿ ಸಂಪರ್ಕಿಸಿ
ಹಾಜರಾತಿ ನೋಂದಣಿ ಅಥವಾ ಜಿಯೋ ಟ್ಯಾಗಿಂಗ್ ಪ್ರಕ್ರಿಯೆಯಲ್ಲಿ ಯಾವುದೇ ತಾಂತ್ರಿಕ ಸಮಸ್ಯೆ ಎದುರಾದರೆ ಸಿಬ್ಬಂದಿಗಳು CEG Helpdesk ಅನ್ನು ಸಂಪರ್ಕಿಸಬಹುದು.
| ವಿವರ | ಸಂಪರ್ಕ ಮಾಹಿತಿ |
|---|---|
| ಮೊಬೈಲ್ ಸಂಖ್ಯೆ | 8277078123 |
| ಇ-ಮೇಲ್ | KAMS.helpdesk@karnataka.gov.in |
ರಾಜ್ಯ ಸರ್ಕಾರದ ಈ ಹೊಸ ತಂತ್ರಜ್ಞಾನ ಆಧಾರಿತ ವ್ಯವಸ್ಥೆಯಿಂದ ಸರ್ಕಾರಿ ಕಚೇರಿಗಳಲ್ಲಿ ಹಾಜರಾತಿ ನಿರ್ವಹಣೆ ಮತ್ತಷ್ಟು ಕಟ್ಟುನಿಟ್ಟಾಗಲಿದ್ದು, ಸಾರ್ವಜನಿಕರಿಗೆ ವೇಗವಾಗಿ ಹಾಗೂ ಪರಿಣಾಮಕಾರಿಯಾಗಿ ಸೇವೆ ಒದಗಿಸಲು ಸಹಕಾರಿಯಾಗಲಿದೆ ಎಂದು ಸರ್ಕಾರ ನಿರೀಕ್ಷಿಸಿದೆ.
